Pagina:Rime in dialetto veneto di Polifemo Acca.djvu/107

Sta pagina la xe stà trascrita, ma la gà ancora da vegner rileta.
ADIO A LE MUSE


     El più grosso maron che i Numi à fato
Xe sta quelo de meterme a sto mondo
Con un teston più d’un'anguria tondo,
Con un ramo de savio e do de mato,
     Per questo in Elicona me sprofondo,
Me rampego in Parnaso co fa un gato,
E per aver sbozzà qualche ritrato
Me credo un genio che no gh’è ’l secondo.
     Ma l’aseno che fa da cavriol
Tombola e peta el sgneco nel leame;
E a mi le culatae, cazza, me pol.
     Sognar la gloria e po crepar de fame,
Xe un gusto che lo lasso a chi lo vol:
Torna più conto assae conzar curame.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/107&oldid=71299"