Luganeghe, persuto e castradina,
Da la roba più scarta a la più fina:
Fritole, peverini e mandolato,
Da i boconi de lusso a quei del gato,
Se no ve basta el son de la manera
Ch’ogni momento fa stremir la tera,
Sentirè le sbragiae de qualche mulo
Che mostra i quarti d’ombolo e straculo;
Un tibidoi1 de babe che va in ziro
Tastando fruti, pan, lardo e butiro,
De massere che strila, che tempesta,
E se sgrafa e se petena la cresta.
Framezo a i picapiere in gran funzion
Per far la strada a schena de molton,
Scoazzeri che mena el sbrufaor
Lavandoghe le braghe a qualche sior,
Qua vedarè passar la filastroca
Dei militi che porta la pagnoca;
I civici pompieri in piena festa
Col speo sul fianco e la pignata in testa.
Zo d'ogni banda capita una fola
De menuagia che vien via de scola;
De machinisti, fravi, marangoni,
Fachini, laoranti e de garzoni;
- ↑ Rumore confuso.
