EL SOSPIRO DE TOMASO CANELA
ANTIFONA
Quando l’Amor vol meterghe la zata,
Can e gato el fa unir soto l’ombrela;
El fa ch’Orlando perda la zavata,
Che deventa Rinaldo una sardela,
E che l’omo più stagno de cervelo
Sporca le braghe pezo d’un putelo.
Una volta anca mi gera de quei
Ch’apena i vede un cotolin che svola,
I core come tanti barbastei1
Ne la speranza de saziar la gola:
E co vedeva certi bei museti
La me zirava più de la Fioreti.
- ↑ Pipistrelli.
