Pagina:Rime in dialetto veneto di Polifemo Acca.djvu/43

PREFAZIONE

Quel patriarca dal barbon d’arzento,
     Muso da galantomo e cuor contento,
     Che sporze a i veci amici el so tabaco
     E per farve un piacer no l'è mai straco,
     El voria che piovesse i mii soneti
     Come de carneval svola i confeti.
     Caro el mio zentilomo venezian,
     Mi no son nato co la pena in man,
     Ma tanto e tanto, a parar via la smara,
     Darò una sdrondenada a la chitara:
     Se no ’l sarà formagio piacentin,
     Ciamèlo pur morioto¹ o pegorin.

1. È il formaggio della povera gente.