LA VENERE DE STUCO
Ghe xe una tosa bionda e profilada
Che da i caveli in zo fina ’l pein
La ve par da le nuvole cascada:
Una madona del pitor d’Urbin.
Languidamente la ve dà un’ociada
Che fa scombussolar el coresin:
Se ghe va drio senza vedèr la strada
Nè sentir le schiocae del veturin.
Co la verze ’l bochin la xe un portento,
Anzi una maravegia de natura;
Ma co la tase, oh Dio, son più contento,
Gesù mio benedeto, un’altra volta
Famela senza lengua a diritura,
O stropeghe le recie a chi l’ascolta!
