Pagina:Rime in dialetto veneto di Polifemo Acca.djvu/66

Sta pagina la xe stà trascrita, ma la gà ancora da vegner rileta.
EL PETEGOLON


     Vu che andè sempre atorno a squaquarar
Quelo che un altro ve confida in recia,
Vignì un momento qua, fiol d’una tecia,
Che ve voi su sto ponto interogar.
     Cossa v’à reso el vostro pampanar?1
Quel remenarve pezo d’una secia?
D'esser sprezià più d’una scarpa vecia
Che nissun zavatin pol repezzar.
     Mi, che nemigo son dei complimenti,
Ve mando nel paese de colù
Co tuti i vostri nobili parenti.
     E saveu cossa fazzo se per caso
Incontro una carogna come vu?..
Levandome 'l capel me stropo el naso.

  1. Ciarlare esagerando.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/66&oldid=71204"