EL SPARAGNIN
Prima de meter fora un carantan,
Vardo ben de no romper la scarsela;
Xe megio strenzer che lascar la vela:
Chi pol saver quel che sarà diman?
So levarghe la polvere al gaban,
Giustar le braghe e repezzar l'ombrela;
Resentarme, se ocore, la scuela,
E contento me sfregolo le man.
Più dreto e sbiseghin d’una formiga,
Curando a tempo sto afareto e quelo,
Me ciapo quatro schei senza fadiga;
E vivo quieto, col timor de Dio,
Nel busetin che m'à concesso el cielo:
Se avè giudizio, fioi, vignime drio.
