L'OMO DE MISTIER
Quatro versi butai come vien vien,
Senza imbrogi de note e de commenti:
Eco el reciamo, la m’intenda ben,
Per trar a mea un mondo de clienti.
Chi leze un libro come se convien,
Vol mastegar la papa co i so denti;
No vol perder un’onza de teren,
No vol trovar intopi nè acidenti.
A quei poeti se ghe dà l'aloro
Che sa mostrarghe al popolo zucon
Traverso a un mar de sienza el fondo d’oro.
I più svelti, i più pratici, i più astuti
Schicara1 in sta maniera, e i ga rason:
Xe i aseni che compra più de tuti.
- ↑ Imbrattano fogli.
