Pagina:Rime in dialetto veneto di Polifemo Acca.djvu/78

Sta pagina la xe stà trascrita, ma la gà ancora da vegner rileta.
L'AVOCATO FILOSOFO


     Lasso el teatro de la mia cariera;
Vendemelo sto tibio1 a chi lo vol:
Più libero saro d’un pagnarol,2
Felicità cercando in altra sfera.
     Voi dedicarme a l’ozio campagnol,
Sgionfarme d’aria da matina a sera;
Dopo disnar voi stravacarme in tera
Col muso a l'erba e 'l mapamondo al sol.
     Sì, voi goder la vita pastoral
Fra le patate, i cavoli, i formenti,
Senza brusor de titoli e d’impieghi.
     Sarà per mi quei loghi el tribunal,
Le piegore e le cavre i mii clienti,
E le bestie da soma i mii colleghi!

  1. Studiolo.
  2. Passero.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/78&oldid=71230"