Pagina:Rime in dialetto veneto di Polifemo Acca.djvu/79

Sta pagina la xe stà trascrita, ma la gà ancora da vegner rileta.
SPIRITISMO


     Nissun omo de garbo e de cervelo
Me podaria de certo contrastar
Che no se dà incantesimo più belo
De quel ch’invida i morti a bagolar.
     Che fa vignir svolando Farfarelo
Quatro ciacole in turco a baratar,
E su la capa mistica del cielo
Fa i numeri del loto sfiamizar.
     Me saltè su che questa no xe sienza....
Caspita! La xe andada apena a scola
E volè che la beca l’eminenza?
     Xela o no xela fia de Pantalon?...
Basta per diventar 'na brava fiola:
Xe so pare che paga la lizion.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/79&oldid=71238"