Apena che me levo la matina
Me vardo in specio; e se go bona ciera,
Come un saltamartin vado in cusina
Per darghe una strucada a la massera
Che tira via dal fogo la pignata
E me porze un scuelon de ciocolata.
Me la bevo in un sorso, e alegramente
Coro a vedèr se in fabrica i laora;
E no stè creder che no fazza gnente:
Fumo, spassizo, vago drento e fora;
Mastego versi, fazzo el pisoloto,
E me muo vinti volte de capoto.
Poco dopo disnà vado in botega
Per dar l'ociada a questa nota e quela;
E gnanca ben scaldada la carega
Me rampego fin su da mia sorela;
Ma se i me dise che l’è in compagnia
De qualche siora vecia, volto via.
Passando per Cavana senza falo,
Buto un’ociada a i carteloni freschi;
A le mincionarie de Seravalo,
Un’altra a le vetrine de Tedeschi;
E lumando qua e là qualche macieta,
Casco in un buso a bever la bozzeta.
