IN MORTE D'UNA MASSERA
Vitima d'una fiera indigestion,
Stira i calcagni, oimè, la mia Tonina,
L'anzolo che vigniva la matina
A desmissiarme e verzerme 'l balcon.
Quela che con un brazzo da Sanson
Revoltava la mescola in cusina,
E co la man de grasso e de farina
Ghe dava quatro ponti al patelon.
In st’Arabia Petrea cossa me resta?
Come da i venti salvarò 'l capelo?
Dove, dove, gran Dio, bater la testa?
Me raccomando a Vu, paron del cielo;
Perchè dopo una serva come questa,
Mare natura ga serà el cancelo.
