EL CODICE D'UN OMO DE SPIRITO
Ridendo sempre e no badando a gnente,
Remenarse qua e là matina e sera;
Aver de fumo piena la caldiera
E fra i gonzi passar per brava zente:
Divertirse e fragiar alegramente,
El manego butar drio la manera,
Slanzarse de galopo e de cariera
Nel circolo più sporco e spuzzolente.
Lussi, done, cavai, teatri e bali;
Stravacarse e dormir tranquilamente
Sora un leto de conti e de cambiali,
Su i gran bigliardi vadagnarse i cali;
Bater la carta e sconder bravamente
L'ongia del ladro soto i guanti zali.
