EL MECANICO
No la ghe bada, sala, a ste marmote
Che vol far i bignè1 senza farina:
L'arte e la poesia no xe dotrina;
Queste, la scusa el termine, xe fote.
Ciamarò sienza quela che camina,
Che slonga el zorno e fa sparir la note,
Che sbusa i monti, fa saltar le grote,
E l'Irlanda co un fil sposa a la China.
Che ghe sequestra i fulmini al Tonante,
Che ne la luna sa ficar el naso,
E l'ocio ne le vie de l'Infinito.
Che Zeusi! Che Prassitele! Che Dante!
Che Olimpo! Che Licona! Che Parnaso!
Riode, stantufi e manoele: ò dito.
- ↑ Frittelle.
