L'OMO
Cànteme, o Diva, el doto paladin
Sbaragiaor dei pregiudizij umani:
El severo barbon da capucin
E la zazzara a bovoli spartani.
Cànteme la casaca da un fiorin,
Le braghesse da vinti carantani;
I scarpini e 'l baston da pelegrin
Che pesta i sassi e mete in guardia i cani.
Càntelo quando, a mezanote, in strada,
El fa lunarj sora qualche stela,
O 'l mastega el problema e la siarada.
Càntelo in mar, co 'l nua come un bisato,
Col capelon de pagia e co l'ombrela.
Càntelo, o Musa, concentrà sul piato,
Co 'l svoda una terina de minestra
Cedendo el manzo e tuto el resto al gato.
Càntelo infin co 'l branca la parola
Per stroparghe la boca a un celegato,1
O sora i dindi com’aquila el svola!2
