LA BIRBA
Soto el tabaro da persona onesta
El prototipo son dei scanaori,
Metendo sul rampin poveri e siori,
No puzando el cortel gnanca la festa.
So dar la mazzocada su la testa
A la malga1 dei mii benefatori,
E dopo aver buscà titoli e onori
Fazzo la rioda e levo su la cresta.
Mi, dopo 'l terzo.... o quarto falimento,
Fumo el zigaro in Borsa come prima,
Gran Cancelier del tredese per cento:
E aciò che 'l mondo sempre più me stima,
Ingrumo e scondo el zucaro e 'l formento
Dei magazeni averti a son de lima.
- ↑ Mandra.
