Siando incolorao con sier Amor,
Per tanti soiamenti, che'l m'ha fatto
Lu da despetto, me fe un brutto atto;
Un dì, che rasonava con mia sior.
El giera armao de sotto el vardacuor,
E disse vogio far con ti un baratto;
E me tirete un gran colpo da matto,
Drento di fianchi, che me zonse al cuor.
Si fattamente, ch'in tel dì d'ancuo
No son vario de cusi fatta bota;
Onde me trovo pi cotto, cha cruo,
E tanto in corpo el fuogo si me scota,
Ch'asiando d'inverno, sempre suo;
Onde son da la zente tolto in nota.
Alboro vittorioso, e triomphal,
Honor d'Imperadori, e de Poeti,
Quanti ne fastu andar magri, e lindeti,
Che per ti no n'ha pro, ne cavedal.
Per certo le brigae, si fa un gran mal,
Quando se vede spiriti descretti,
Che per cattiva sorte, e poveretti,
A no impirghe d'ingiostro el caramal.
Zentilezza de sangue, ni bel fante
Armigero, piacente, o vertuoso,
No s'apriesia si no, quanto besogna.
Un savio el mondo, el reputa furfante,
E muor da fame, chi è troppo inzegnoso,
No consiste a piar pesse bona togna.
