Vu che ascoltè ste rime desdolae,
E i scarsi mie suspiri lamentosi.
Amor si ma le mie carne squarzae,
Per far i mie desegni gramezosi,
Da dolor le muande se ha molae,
Onde i piombini roman vergognosi,
Ni credo mai haver il mio contento,
Fin che no lievo centura d'arzento.
Si Giove se muete in tun manzeto,
L'have rason per l'amor de Uropa,
Ficandose tra i altri el povereto,
In fin che ella ghe montete in groppa.
E lu presto corrando de ficheto,
Ghe fese altro cha peterar stopa.
Mi no me incurerave esser un corbo,
Pur che liogasse un dì mio fradel orbo.
El zorno, che seguì l'horribel caso,
Che Amor con la balestra me trazete,
Questo si fio de Luio a san Trovaso,
Innamorao in tuna fia d'un prete,
Lu crete darme al cuor, e de in tel naso,
E la bota passà per le scarpete,
E si no me tirava da una banda,
Perdeva i fiochi della mia muanda.
