Quando ti vol far vera da bon seno,
Armando fuste, galie grosse, sutile,
Barze, barzoti, e anche galioni,
Nave navilij, schirazzi, e marani
Guidai da marineri huomeni pratichi
Soldai da terra i primi capetanij,
Che se possa trovar con l'arme in dosso
Da far tremar el Ponente, el Levante,
O quanti che te porta gran invidia,
Cercando de voler desverzenarte;
E farte perder la to libertae.
Ma san Marco beao, e pretioso
No manca de sufragij sempremai,
Pregando Dio, che te varda da tristi,
Conservandote pura, casta, e santa,
Libera, bella, zentil, e piatosa,
Cortese, humana, signoril, e granda,
Piena de quei costumi rari al mondo,
Che chi te gusta un certr tempesello,
I no se puol partir da ste lagune,
Lassando al fin la vita, i soldi, e l'anema.
E le osse sepelie in le to giesie,
A dolce fia de Giove alma Veniesia,
Che quei che no te vede no ta priesia.
