È possibel ch'Amor non'habbia fame?
A vederlo cusi forte smagrio,
Chel par proprio una statoa de legname.
Vu vedè pur, che le tutto scachio,
Perchel manza sino pan, e ceole,
Sto cavestro, giotton, peto pulio,
No vacorzeu, che tutte le verole
Ghe core drio, per darghe sul culo,
E lu se sconde, con le braghe mole.
Sto mariol s'ha messo per trastulo,
Un pugnal in la scena ben guzao,
Con do balote, chel someia, un bulo.
Per so cason son tanto imbertonao,
E'l martel in ti fianchi pesta forte,
Chel se sente per tutto rio terrao.
No n'ho per questo le muande storte,
Ma spiero chel no passerà do anni,
Che muerò la chiave s'un ste porte.
So ben che un zorno insserò de affanni.
Che sarò liberao de inamorarme,
E tal che ride, si pagherà i danni;
Mo per adesso, e voio contentarme.
