SCENA V.
Orsolina e Giacomo (sempre scrivendo).
Orsolina
Se geri no pioveva ghe parlava mi a quel florindo napoletan! El la sposa o nol la sposa? O drento, o fora, che a mi no me piase sti smorosessi senza conclusion! Tirite in là co ste cartazze! Ti vol par ti tuta la casa? Bisogna che te fassa un lungo discorso. Mi stanote no potendo mai serar ocio go pensà e ripensà anca a la Carolina. No la fa per la nostra casa assolutissimamente! La xe tropo indrio! tropo ignorante! E pò vusto che te lo diga? Per mi, intanto quela putela no la ga cuor! La ga visto gieri che me son inrabiada con Temistocle al punto de farghene una malatia... Ma distu ti, che la gabia pensà de dirme, stamatina, una bona parola per cercar de confortarme? Gnente! tanto de muson!
