Giacomo (scrivendo)
E alora, manda a ciamar la Rosa che la se la vegna a tor...
Orsolina
Ma per vegnir a sta conclusion, stanote, come che te diseva, go pensà e ripensà, andandoghe drio a un'altra idea. Metemo el caso... che la Clotilde... speta a parlar, no saltarme ai oci!
Giacomo (c. s.)
Mi cara... mi no me movo!
Orsolina
Metemo el caso... che la Clotilde... che la Clotilde la fusse proprio pentìa de quel che la ga fato; come gieri de sera me assicurava la Apollonia? per afezion, me piase dir la verità, la giera affezionatissima! E pò la gaveva do qualità, caro mio, che no se trova tanto facilmente, la sveltezza e la pulizia!
Giacomo (c. s.)
Tornèmo a tor la Clotilde.
Orsolina
Quando se trata del vostro ben, mi me sacrifico sempre. D'altronde, nela mia condizion,
