positi: de rovinar i altri e de rovinarte ti per sempre. Dimelo? Uno... che, squasi, no ti sà gnanca chi el sia!... Senza esser gnanca sicura ch'el te volesse proprio ben... de quel ben serio, onesto, che no bada a qualunque sacrifizio, che ariva a tuto: el ben d'un galantomo! A ti per esempio, scometo, che se te capitasse, un omo come mi... nol te piasaria! Ghe vol i botoni lustri, la parlantina che sona ben a le recie, e ch'el vegna da lontan, co qualcosa intorno de misterioso. Questo xe belo, questo xe romantico! (sospirando) Anca ti, come quel sempio de to fradelo, ti ga fato el to romanzo. Ma lu, vedistu, el xe un omo; el li fa i romanzi a spese de la Adriatica, robandoghe le ore, e la carta... Ti invece el to romanzo, ti lo ga fato a spese tue, a spese de la to felicità, del to onor. No, no, d'ora in avanti prometime de aver confidenza in to pare... el to pare, pantalon! Prometime de no desmentegarme più! Ti sà sempre dove trovarme. (indicando il tavolino) Vienme arente! Stame sempre arente! (con effusione d'affetto) Se aiuteremo tuti dò!
Oh, papà!
