Al sera e l'altra sera jè dò sere,1
El bene mio non ò visto vegnêre:
Aspeto un'altra sera che no' l vegna,
Ghe mando a dir che altre strade el tegna;
Aspeto un'altra sera che no' l veda,
Ghe mando a dir che d'altra el se proveda.
El me moroso che l'è nome Nane,
Le chiavi del cuor mio el ghà in le mane;
El gh'ià in le mane e no 'l me le vol dare,
Démele, Nane, e no me fè penare;
El gh'ià in le mane e nô ’l me le vol dire,
Démele, Nane, e nô me fè morire.
Vêtelo là, vêtelo là ch'el vedo,
L'è bianco, rosso, el me par un povejo;
Se l'è un povejo, zimèghe la coa,
Se l'è el mio caro ben la strada è soa;
Se l'è un povejo zimèghe le ale,
Se l'è el mio caro ben lassèlo andare;
Se l'è un povejo zimèghe lo beco,
Se l'è el mio caro ben metìlo in leto.
Molinarel da la bianca farina
Coi oci el guarda e con le man rampina;2
Coi oci el guarda se gnissun lo vede,
E co le man el raspa senza fede;
Coi oci el gira se gnissun lo guarda,
E co le man el raspa e el mele in tasca.
