9Anca el nostro gramazzo zogelier
À capio che 'l romito xe un ometo.
El gaveva per disgrazia una muger,
Che tutto el dì mandava roba in gheto;
Ma fa ancuo, fa doman un tal mistier,
Per dia! che se n'à acorto el bon cucheto,
E doparando a gradi un bravo legno,
El l'à messa a la fin sul bon contegno.
10Saveu quanti ghe n'è de talequali
Che xe pitochi e che no sa perchè,
Che ga la testa simile ai cocali,
Che se fida de quanti che ghe xe?
Che tardi se ne acorze dei so mali
E tardi i va cigando: Oh dio, oimè?
Ma rimedio no gh'è per el so mal
Perchè più no se trova un fra Vidal.
