Come un susio che in distanza
Da prinçipio xe confuso,
Ma che ingrossa, che vien suso
Co’ una furia de uragan.
Le xe lore, za le ariva,
Za le spunta, za in t'un lampo
Case, strada, ponte, campo,
Tuto introna de bacan.
Le xe lore, le xe tose,
Le ga el viso fresco e tondo,
Le vien via sfidando el mondo,
Imbriagae de zoventù.
Zavatando per i ponti,
Le vien zoso a quatro in riga,
Par che a tuti le ghe ziga:
Largo, indrio, che semo nu!
Za la zente su le porte
Sta a vardar la baraonda,
Che infuriando come un’onda
Urta, spenze e passa in là:
Qua un vecieto scaturio
Va tirandose drio al muro:
Là una vecia, più al sicuro,
Varda e ride dal balcon.
Ma le ariva e za le passa,
El xe un refolo de vento,
Za el fracasso in t'un momento
Va perdendose lontan.
E la strada per un punto
Da quel ciasso desmissiada,
Quieta, straca, abandonada,
La se torna a indormenzar.
