Ter. L'aspeta, che adesso ghe l'andarò a ciamar (via).
Giov. E cussì? come ghe par che la vada?
And. Chi?
Giov. Oh bela... l'Ema co' Marcelo...
And. Mi... ben!
Giov. Ciò, sarà! mi no digo gnente, ma da quelo che go capio me pareva... che ghe fusse dei malumori.
And. (un po' seccato). Oh Dio! Sempre alegri no se pol esser!
Giov. Sì, ma co quel omo, per quanto che i diga che adesso el sia cambià, mi saria su tuti i spini...
Emma (entrando). So qua, so qua Siora Giovana, vala via?
Giov. Sì, benedeta! Me dispiase che i sia vegnui a disturbarte.
Emma. No, no, la se figura! Gera de là ne la mia camera, che giusto cercava sta croseta de la povera Adele, perchè la ghe la portasse al so Daniel.
Giov. Cara la mia Ema! Sempre cussì bona!
Emma. Sò, ch'el la gavaria avuda tanto cara...
Giov. Sì, benedeta! Anzi proprio stamatina el la gaveva domandada... Ma cossa vustu che te diga... me par che adesso no saria gnanca el caso... perchè come ghe diseva anca a to mama, a lu tuto ghe serve per meterse in passion!
