Pagina:Selvatico - Commedie e Poesie Veneziane, Milano, Treves, 1910.pdf/293

Sta pagina la xe stà trascrita, ma la gà ancora da vegner rileta.
A VENEZIA.


No gh’è a sto mondo, no, Çità più bela,
     Venezia mia, de ti, per far l’amor;
     No gh’è dona, nè tosa, nè putela
     Che resista al to incanto traditor.

Co’ un fià de luna e un fià de bavesela
     Ti sa sfantar i scrupoli dal cuor;
     Deventa ogni morosa in ti una stela
     E par che i basi gabia più saor.

Venezia mia, ti xe la gran rufiana,
     Che ti ga tuto per far far pecai:
     El mar, le cale sconte, i rii, l’altana,

La Piazza e i so colombi inamorai,
     La gondola che fà la nina-nana...
     Fin i mussati che ve tien svegiai!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Selvatico_-_Commedie_e_Poesie_Veneziane,_Milano,_Treves,_1910.pdf/293&oldid=72952"