Bepo. Voleu veder che ti te la ga ciapada? Adesso te dirò... Me sentiva sono e....
Piero. Va là, va là, no starte a inventar, che za mia mare m'à dito tuto.
Bepo (con sorpresa). Cossa t'ala dito?
Piero. Che t'à ciapà mal... ti me capissi?
Bepo. Co ti lo sa, basta. (fra sè) Respiro.
Piero. E gastu fato ora de vignir a casa?
Bepo. Eh, eh, altro che ora!...
Piero. Cossa che xe i açidenti; i sarà stai quei do goti de vin che ti ga bevùo da mi.
Bepo. Proprio quei, e varente Dio, so no go maledio la volta che so vegnuo dessuso.
Piero. To mugier dove xela?
Bepo. La xe andada a messa.
Piero. T'ala po' crià gieri sera co la t'à visto in quei stati?
Bepo. Criarme a mi? Parcossa?
Piero. Ciò, ciò, no ti te recordi più quelo che ti m'à dito gieri sera?
Bepo. Cossa t'ogio dito?
Piero. Che la xe la marantega, che sempre la te cria.
Bepo. Sssst... Sarò stà imbriago.
Piero. Va là, che ti geri più sinçiero de mi.
Bepo. Tasi, Piero, fame sta grazia.
Piero. No ti ga dito che la xe a messa?
Bepo. Sì, ma go sempre paura che la me sbocia fora da qualche parte.
Piero. Ah, go capio.
Bepo. Piero, per cambiar descorso, to mare t'ala dà bezzi?
Piero. De le ostarie la m'à dà.
