Cate. E cussì, e cussì, mi no voressi dir gnente, ma a bon intenditor... co' quel che segue.
Piero. Credeu che Bepo sia ancora un bambin de do ani?
Cate. Digo, spolvero in te i oci a mi no me se ne mete, saveu? In quel çerto logo... za ti m'intendi, chi xe che lo ga condoto? So vecia, sa, mi del mestier, e quando che Bepo vien a casa ghe lezo in tei oci dove che'l xe stà fin alora.
Piero. Varente Dio, che co' mi no l'è mai vegnùo in loghi cativi.
Cate. Lassemo andar sto descorso.. omo avisà, xe mezo armà, e mi no ve digo altro. Spetè inveçe che me senta. (siede).
Piero. Ma da galantomo, siora Cate, che sta roba la me despiase.
Cate. Basta, go dito, e spetè che me senta.
Piero. Seu straca? No sè stada a messa?
Cate. Adesso ve contarò, e ridè che la xe da ridar. Giusto a messa ghe gera una de ste sgualdrine, che, casse! no le se degna de inzenociarse viçin de la povera zente; la me gera da drio in piè. Mi che sò la bona creanza, me strenzo per darghe un poco de posto, ma ela, dura come un palo. Gala vogia de deventar granda, che no la se inzenocia? digo mi. Ma ela gnente. La gavaria vossudo che me levasse suso, ma mi che gaveva capio el bergamo, stà inzenociada tuta la messa, e làssela in piè. No gogio fato ben? Casse! gavevela paura de ciapar i peoci? Se ela gaveva l'abito più belo del mio, mi forsi, forsi, gavarò vudo la camisa più neta de la sua. Parchè, digo, so lavandèra, e ste siore dai abiti de seda le conosso.
