Che no i fusse un leame in t'un tesoro,
Un fango sora i fiori?
Va pur cussì, che sta umiltà te inalza;
Va, povereta! altiera
Cussì co i pie per tera,
Chè ti è pi bela quanto pì' descalza.
Com'el Ciel me strabalza
A una belezza estrema
In t'una casa che no gh'è do squele!
Providenza suprema
Del Cielo e de le Stele,
Che xe andà a catar fuora do despersi
Per unir le so' strazze co i mi versi!
Strazze mie care, onde ho revolto el cuor,
Dolce strazze amorose,
Finestre de la grazia, ochi de amor,
Strazze fodrae de riose,
Chè se vede spontar tra lista e lista
Fuora da quei sbregoni
Quatro dea de galani
Che traze lampi che me tiol la vista!
Fia mia, chi no te ha vista
Xe un omo mezo vivo;
Chi te vede e no muor xe un zoco morto;
E mi, che te descrivo,
So che te fazzo torto,
Che te tanso la gloria e te defraudo,
E te stronzo l'onor pì' che te laudo.
Podess'io pur, con darte la mia vita,
Trovar pì' lengue a usura,
Chè la mia sola a una beltà infinita
Xe picòla mesura!
So che no digo gnente a quel che lasso,
