Ma quel puoco che intendo
El mesuro, el comprendo
Co' se mesura el Ciel con un compasso.
In sta belezza passo
La mia vita contenta,
E trovo salda fede in veste rote;
Mi no ho chi me tormenta
Nè el zorno nè la note;
Ghe xè un voler e un'anema in do peti,
Cosse che ghe n'è puoche in molti leti.
Cerchè, Done, d'aver laghi de pianti,
Refoli de sospiri,
E sempre avanti eserciti de amanti;
Formè niovi martiri,
Nudrive cento diavoli in t'i ochi
Che tenta i cuor contriti;
Cerchè che mile afliti
Ve se vegna a butar morti in zenochi:
Amor, sti me infenochi
Mai pì', frizeme alora,
Che te parechio la farina e l'ogio.
Questa è la mi' Signora,
La me vuol, mi la vogio;
No gh'è qua da arabiar nè da istizzarme;
Chi vol guera d'amor se meta in arme.
Canzon mia repezzà,
Sti è per sorte represa, e ti reprendi
Chi te reprenderà;
Mostra che ti la intendi,
E dì', che sti no ha drapi de veluo,
Che quel ch'è Dio d'Amor va sempre nuo.
