Faceva su un pontil conversazion
Do barcarioi, un zovene de etae
Co indosso la livrea, l'altro strazzon
4E co dei ani su la goba assae.
Per cossa, dise el zovene, mai bon
No seu stao de servir in ste casae,
Che, per la morte adesso de un paron,
8Giubilao ziraresi le contrae?
Perchè, responde el vechio, el servitor
Ma parso sempre de una sogia un travo,
11Che mai no vede in caneva splendor;
E sul tragheto ò volù far el bravo,
Vivendo come tì del mio suor,
14Povero sì, ma no venduo, nè schiavo.
Per guadagnarme el pan son barcariol,
Ma sò anca mi qualcossa de creanza;
Chè, benchè nato sia povero fiol,
4Mio pare m'à insegnà la bona usanza.
El me diseva: Dona da faziol
Saluda, se ti vol, in vicinanza;
Ma dona da zendà, più che ti pol,
8Cerca de saludarla in lontananza.
Per cossa, pare, un dì gò domandao,
Che fassa me insegneu sta distinzion?
11Prima serio un pocheto el m'à vardao,
Pò el m'à risposto: Vustu parer bon,
E in fin dei conti no restar burlao?
14Stà arente a quei della tó condizion.
