Una bela ragazza da mario,
De quele tagiae zoso a la carlona,
La ghe dixeva un dì a só siora nona:
4Mo via, no la me vegna sempre a drio.
Gala paura che me buta in rio,
O che de andar mi sola no sia bona?
La me creda, sò far, sò far da dona,
8Cognosso quanto ela el fato mio.
Giusto per questo sala, siora sprota,
Vòi starghe arente, perchè xè le pute
11Tante pignate, ma de tera cota;
E se le casca, siele bele o brute,
Le canta dopo da pignata rota,
14E sta desgrazia nasse quasi a tute.
Corpo de Bajamonte! premi sù,
No ti vedi che vago quà a sta riva?
No ti senti che i ziga: Nane, ariva!
4E se ti stali, mì no arivo più?
E dai pur! Xestu orbo o sordo? A vù!
No ti lo intendi el son de la mia piva?
O che ti è de una razza assae cativa,
8O che, per dia, ti xè el gran turlulù!
Ma adesso gò capio! ah te cognosso:
Ti è un bastardo, ti favi el zavater,
11E ti è de queli da quaranta al grosso.
Maledeto chi cambia de mestier!
No xè tuto per tuti, e livrea indosso,
14Nè premer, nè stalìr pol far saver.
