L'onorato mestier del barcariol
Xè stà sempre a Venezia respetà,
Soto la sferza de qualunque sol,
4Dai citadini e da la nobiltà.
Un servitor da barca có se tiol,
Oltre voler che el gabia abilità
De vogar, che lù el gabia anca se vol
8De segretario inzegno e fedeltà.
Infati cossa xè la barca in pien
Altro che un camerin sentimental,
11Dove a star col só comodo se vien?
Chi voga sente tuto; e natural
Xè che, senza poder far molto ben,
14Un barcariol pol far assae del mal.
Per tì, cara Mariela, vegno e vago
Sù e zoso per sta longa fondamenta,
E come i zavateri tiro el spago,
4E come el gato gò la vista atenta.
Ma no te vedo: onde assae mal mì stago,
Nè gò vogia de pan, nè de polenta;
E tanto forti xè i susti che trago,
8Che credo che de là de Strà i li senta.
Gò el paron a le Rive che me aspeta,
Ma no sò cossa farghe: so ostinà;
11Gnanca de quà me move una saeta.
Perderò el pan, morirò desperà,
Se cussì proprio vol la mia disdeta:
14Chi sà far conti no xè inamorà.
