PRIMI ZORNI DE OTOBRE.
Xe tristo el çielo, tristo e imusonà
e par ch'el pianza — Che malinconia
che fa sti di' de otobre: par che sia
4squasi squasi l'inverno scominzià...
Le fogie casca a una, a do', co' un fià
de vento, e la campagna imatonìa
se vede a scomparir e portar via
8tutte le so' beleze de l'istà.
Ma cossa me ne importa, cossa mai
se scominzia la neve, el fredo, el gelo,
11cossa me importa se no xe indorai
I monti, le campagne, el pian, el col?
Cossa me importa che sia triste el çielo
14se nel mio cuor ghe brila sempre el sol?
