Pagina:Strade e vicoli.djvu/48

     E studia che te studia, finalmente,
Un figurin più bel de lu no gh’è;
No el sbaglia un ete da la testa a i piè:
E quando che el se trova fra la gente,
I lo guarda — e no digo ’na cagnara⁶⁰ —
Come se guarda qualche bestia rara.

     Ecolo in do parole: L’è in lampeti,⁶¹
Col gilè bianco, a fiori, o blu o scarlato
E tanto de cadena d’oro mato:
Braghe curte, a penel, sensa difeti;
Scarponcini a l’inglese, bianchi o giali,
De pele fina che no fassa i cali.

     Intorno al col che lo tien li picà,
'Na bona mesa spana de coleto;
Bafi da surla,⁶² barba a peneleto,
E un gran ciufo che sponta petenà,
Dal capel a la lobia: nel complesso
Un bel gingin⁶³ de quei che se usa adesso.

     A i tempi de Romeo se usava sempre
— Ma i era tempi se volì maneschi —
De portar su i vestiti pitoreschi
Spade, stili e pugnai de bone tempre.
Cambiadi i tempi, el nostro l’è contento
De un bastonçin col pomolo de argento.