Pagina:Trieste vernacola.djvu/105

Sta pagina la xe stà trascrita e rileta.
LE SERVE.


— Co le serve? Madona benedeta,
Bisogna star atente, bazilar.1
— Ogi, una bona, chi la pol trovar?
— La me lo dighi a mi, siora Marieta!

— Zinque in t'un mese go dovù cambiar.
— Una ghe roba; st'altra, 'na muleta,2
La ga sempre un moroso che la speta;
― La terza no ghe comoda 'l magnar!

— Ghe ne go vù mi una che, ogni mese,
Per andar a dormir col suo soldà,
La se fazea mandar sto telegrama:

«Parti stasera, che xe morta mama!»
Noi gavemo una mania: quela là
Ghe ne devi aver 'vude almeno diese!3

  1. bazilar, ammattire
  2. 'na muleta, una ragazzina
  3. diese, dieci.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Trieste_vernacola.djvu/105&oldid=65842"