Pagina:Trieste vernacola.djvu/116

Sta pagina la xe stà trascrita e rileta.
STORIELA VERA.


La incontravo ogni giorno, de matina,
Che la andava in no so che magazin,
Palida, delicata, scarmolina,1
Ma assai graziosa, tanto un bel sestin;2

El far e l'aria de una signorina;
E ghe tocava inveze (xe un destin?)
Per guadagnarse el pan far la fachina;
Con quei brazzeti! con quel petisin!3

Po' tanto tempo no la go incontrada,
Me iero squasi za dismentigà;4
Suo nono vedo un giorno per la strada:

«Bon giorno, caro nono, come el sta?
E la biondina dove la xe andada?»
El ga guardado el ciel e sospirà...

  1. scarmolina, magra, esile
  2. un bel sestin, un bel farino, un fare garbato
  3. petisin, seno piccolo e delicato
  4. dismentigà, dimenticato.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Trieste_vernacola.djvu/116&oldid=65853"