LA MOGLIE PERFETA.
Quei maridi xe proprio fortunadi
Che ga intivà1 una moglie seria e onesta,
Senza lussi nè grili per la testa,
De quele done dei bei tempi andadi.
Sempre serada a casa sua la resta
Cussì i pranzi xe in punto cusinadi,
E i palcheti xe sempre ben lustradi.
La xe tranquila, economa, modesta.
Ma per lo più el marì de sta fenice
Xe tanto inamorà, tanto felice
E cussì sodisfado dela sorte.
Che apena che 'l incontra una doneta
Vestida un poco in gringola2 e ziveta,
Eco che 'l ghe fa subito la corte!
