Pagina:Trieste vernacola.djvu/156

Sta pagina la xe stà trascrita e rileta.
VEDOVA.


Che dolor! che dolor! Che disgraziada!
No la se pol calmar, la fa pietà!
La pianzi come mata, disperada,
El marì ghe xe morto un'ora fa.

Giovine ancora, vedova restada,
Sola in sto mondo cossa la farà?
De lu la iera proprio inamorada,
Tuta la vita la lo pianzarà.

— Via, la se calmi, dài,1 iera destin... —
La conforta cussì una vedovela
Vistida in luto, ultimo figurin.

— Calma? mai più! sarò sempre in sto stato...
E guardando l'amica: — Ma che bela!
Sto vestito che sarta ghe ga fato? —

  1. dài! via! suvvia! orsù!
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Trieste_vernacola.djvu/156&oldid=65925"