EL SAPIENTON.
Con un far de dotor, che no ve digo,
In mezo a quatro sempi1 che lo inchina,
Podè veder, de sera e de matina,
In cafè, montà in catedra, l'amigo.
E là, sfogiando la sua parlantina
Davanti a quei che no capissi un figo,
El ghe consegna a tuti quanti un spigo,2
De la naranza de la sua dotrina.
Me son ficado anca mi un giorno là,
Per tentar de scrocarghene una parte,
E son contento perchè go imparà
Che Saffo iera un romanzier persian,
Pitagora un'etrusca butacarte
E Zoroastro un senator roman.
