EL FILANTROPO,
El pesta 'l timbro,1 e vien el segretario.
«La comanda, signor comendator?»
— La cioghi un poco in man el calendario.
Doman no semo ai oto? — «Sissignor!»
— Me pareva anca a mi. Se no zavario,2
Xe un ano che go perso el fio dotor.
Qualche oblazion pe 'l tristo aniversario
Ghe vol. Cossa la disi? — «Sissignor!»
— Bezzi3 e lista eco qua. La cori, sù,
Perchè le redazioni dei giornai,
Se la ritarda, 'verte no xe più....
Ga batù — Chi xe?... Un povaro?... In malora!
No i lassa in pase, sti pitochi, mai!...
La dighi che 'l paron xe andado fora.
