Pagina:Trieste vernacola.djvu/90

NO STEME TORMENTAR.

I.

Fazzo l'amor, xe vero,
Cossa ghe xe de mal?
Volè che a quindes'ani
Stia là come un cocal?¹

Se tuto el santo giorno
Sfadigo a lavorar,
Xe giusto che la sera
Me fazzo compagnar;
Fazzo l'amor, xe vero.
No steme tormentar.

II.

Vado a nudar,² sicuro,
Cossa ghe xe de mal?
Co sto tantin de caldo³
Xe più che natural.

Go el vestidin setado,⁴
E se anca i vol guardar,
No son cussì malfata
De averme a vergognar;
Vado a nudar, sicuro
No steme tormentar.

1. cocal, alcione
2. nudar, nuotare
3. co sto tantin de caldo, con questo po' po' di caldo
4. setado, assettato, aderente al corpo.