PASSANDO TRAGHETO
Paron, vala de là co sta butada?
Ciò, Baicoli, speta: el vaga là —
Ciò, la me toca a mi, sa, sta parada;
Xe un'ora che la speto el vegna quà.
Oh, dal sandolo, el daga 'na sciada;
Varda quel pantalon come che 'l va!
Saldo in gambe... zo... pum... la go schivada;
Ma no so gnanca mi come sia sta.
E sì che go zigà; ma salo mosso?
No i sa andar par el mondo e i fa malani.
Ciò, Nasi, doman l'altro, se mai posso,
E se Dio ne conserva vivi e sani.... —
Digo, vardè el tramwai che ne vien dosso —
Ciò, come la magnemio, fioi de cani? —
