SONADORI SOTO L'ALBERGO IN CANALASSO
Slonga quela vogada, fate soto;
Cussì va ben; adesso va a pianeto —
Che stufo che so mi, xe squasi un boto;
Fiol d'un can de mestier stramaledeto! —
Sonemo el Nicolà che 'l cava el goto —
El vaga che xe megio el Rigoleto —
Ben zo; coragio ti co quel subioto,
Bravi, cussì va ben — Ciò, che i sia in leto? —
Atenti a la bacheta, orpo vardeme! —
Sior sì, ma curta, perchè semo stanchi —
Ciò, foresti, butè, ma no copeme. —
Ti stoni; in te 'l più belo ti me manchi;
Forza co quel violon, zo, tuti insieme!
Deghe ben drento che i xe un per de franchi! —
