APENA MOLAI DA SCUOLA
Varda quela che naso! in te i casoti
La pol farse mostrar. Che pevaron! —
Ciò, portème rispeto, sbardassoti —
Orpo la xe ben messa de timon! —
Marcia canage! marcia figuroti! —
La se tegna stagando in te 'l canton —
Vieme viçin se ti vol do sbarloti —
Lassela star, ma sì, la ga nason.
La me fassa un piaçer, la me lo nasa —
La borda, eh no gh'è mal, gh'è dei bei tipi! —
Cassa, i me dise adrio, vorlo che tasa?
A lu, i vien suso co sti bei prinçipi!
Gali imparà dal mestro, opur a casa?
I tase adesso, ah sì! — Orpo che pipi! —
