CRITICA
Varda, se ti vol vedar, ciò, Rosina,
Varda che culo che la ga impontio! —
Oh bruta stomegosa capelina! —
Ciò, la vol che i ghe varda proprio adrio! —
Che i sia sui, ciò, quei peti? — La bustina
Col bombaso la xe! — Ah go capio! —
Che piume, che capelo al'assassina! —
Ciò, parla pian che la te ga sentio —
Cossa me importa a mi? Che strigossada! —
Se la va ben la ga le scarpe rote! —
La xe in te'l viso tuta piturada. —
Rosina, disi ti; ma xele fote?
Chi porla mai trovar quela squartada? —
Sì, ma forsi la gà 'na bona dote. –
