BAROMETRO
Sentelo sto sciroco? — Un fià de bava
no ghe xe proprio che xe çinque dì —
Mi so vegnudo qua perchè sperava
de respirar; ma cossa! — E istesso mi;
El varda, proprio adesso lo pensava
che avanti no se pol andar cussì;
Geri s’à nuvolà, po tonisava;
Ma se ga sfantà tuto e sćiao bondì —
No se sta ben che in acqua — E co 'l vien fora,
Pezo de prima! El diga, se no sbala
Sto sofego, me vien za 'na malora —
Ah, ma no 'l dura; el vedarà ch’el cala —
Che Dio fassa! — Mi go indovinà ancora;
Go 'l calo che me dol: quelo no fala! —
