Pina. (con aria innocente) Me ciamistu mi, mama? So qua. Cossa vustu?
Nana. (severa) Da dove vienstu fora?
Pina. Mi? Ah, gera andada un momento là in coridor a cercarme una strisseta de pele... che...
Nana. Eh, la strisseta de pele, si! Me parè çerte pele vualtri do! (A Pina) Ma no ti sa che to pare no vol che ti vegni qua a farghe perdar tempo a Piero? (A Piero) E a ti, cossa te predichelo sempre el to paron? Che ti staghi al to posto e che ti lavori...
Piero. Ma qualche volta bisogna pur che me mova...
Pina. (con intenzione) Ma le man se le tien a casa!
Piero. (con allusione analoga) E le scarpe no se le toca!...
Nana. E, quando se ga da çercar qualcossa nei loghi scuri, se va uno ala volta, perchè insieme no se trova mai gnente...
Piero. Oh, la senta siora Nana, infin dei conti la Pina xe mia morosa e...
Nana. Cossa vol dir?
Piero. Che qualche confidenza posso tormela...
Pina. Gnente afato. Mi confidenze no ghe ne vogio.
Nana. La ga rason!
